কিবা কর ইন্দ্ররাজা নিচন্তে বসিয়া।
ঘুঙ্গানি বৈস্সন তুই দে আরো ছাড়িয়া॥১১৪০
নাগাও ফ্যারেন্তা ম্যাঘ হইয়া ছাড়াছাড়া।
কোন দিয়া জল বেরষ্টি কোন দিগে খরা॥
এলা হানে আইস ঝড়ি ব্যাল হ্যান পাতর।
তিন মুল্লুক ছাড়িয়া বৈস দোকানের উপর॥
হাড়ির বাক্য ইন্দ্ররাজা ব্রথা না করিল।১১৪৫
রিমিঝিমি বৈস্সন বস্সিতে নাগিল॥
হাড়ি বলে হারে বেটা রাজদুলালিয়া।
রানির কথা বলছিস বেটা মোক মারলির উপর।
ক্যামন রানি ছাড়ি আইলু আপনার মহল।
দোনো রানি নে বেটা শ্রীকলার বন্দর॥
আর নে রানি নাগে তোর বরাবর।
আর কিছু রানি দ্যাওঁ তোর গলার উপর॥
অকারন করি রাজা কান্দন জুড়িল।
হল্দিবেচি আর কালাইবেচি বড় ঝগড়া নাগাইল॥
মোলাবেচি উঠি বলে কলাবেচি বাই।
ছাড়ি দেই রাজার কোমর আগোত ধচ্ছি মুঞি।
হল্দিবেচি উঠি বলে কালাই বেচি বাই।
দন্দ ঝগড়ার কাজ্য নাই পিরিতি করিয়া জাই॥
রাজার কান্দনে হাড়ির দয়া জরমিল।
ইন্দ্র রাজা বলি হাড়ি ডাকিবার নাগিল॥
বান্দা নেও বান্দা নেও গোয়ালীনী মাই।
বার কড়া কড়ি থাকিয়া বান্দা থুইবার চাই।
বার কড়া কড়ি পাইলে গাঞ্জা খাইবার চাই॥
দেখি দেখি কেমন চেলা দেখিবার চাই॥
হাত কোনা ধরিয়া রাজাক বেইর কৈল টানিয়া।
ঝলমল করিয়া রাজা উঠিল জলিয়া॥