জ্যান কালে বুড়ি মানা একথা শুনিল।
সোনার ঝাড়ি ডাঙ্গি মএনা কপালে ভাঙ্গিল॥৩২০
শিশের সিন্দুর হাতের শাঙ্খা মৈলান দেখিল।
কপালত চড়িয়া মএনা কান্দন জুড়িল॥
একটা রামের পল্লব হস্তে করিয়া।
সোয়ামি সোয়ামি বলিয়া চলিল কান্দিয়া॥
আপনার মহলক নাগি গমন করিল॥৩২৫
মানিকচন্দর রাজার জ্ঞাত সক্কল আনিল ডাক দিয়া।
এক দণ্ড থাক আমার সামি আগুরিয়া॥
ডাহিনি মএনা জাই আমি জমপুরি নাগিয়া।
ঘাটাএ পথে নাগাল পাইলে জিউ আনি ছিনিয়া॥
জ্ঞাত সক্কল রাজাক থাকলো আগুরিয়া।৩৩০
ডাহিনী মএন। জাএছে তবে জমপুরি নাগিয়া॥
আপনার মহলে আসি দরশন দিল।
একশত রানি রাজার কান্দন জুড়িল॥
চরনে ধরিয়া মএনার কান্দন জুড়িল॥
হেমাই পাত্র বলি মএনা ডাকিবার নাগিল।
ডাক মধ্যে হেমাই পাত্র দরশন দিল॥
মএনা বলে শুন হেমাই কার পানে চাও।
জত মোনে গিয়াস্তা আইস ধরিয়া॥
জখন হেমাই পাত্র এ কথা শুনিল।
জত মোনে গিয়াস্তা ডাকিয়া আনিল॥
গিয়াস্তার তরে মএনা বলিবার নাগিল।
কি কর গিয়াস্তা সকল কার পানে চাও।
সোকল গুলা থাকেন পহারা বান্দিয়া।
যাবৎ আইসোঁ মএনামতি যমপুরিক দেখিয়া॥
পারেক জদি ধম্মি রাজাক আইসন ধরিয়া॥
