ডাকার্ণব
ওঁ নমঃ সর্ব্ববীরবীরেশ্বরীভ্যঃ॥
এবং ময়া শ্রুতমেকস্মিন্ সময়ে ভগবান্ মহাবীরেশ্বরসর্ব্বতথাগতবীরকায়বাক্চিত্তযোগিনীভগেষু ক্রীড়িতবান্। তত্র মহাবীরেশ্বর উবাচ।
ইন্দ্রজাল ময়া দৃষ্টং মহাসুখসমাধিনা।
সংসারব্যবদানেন নির্ব্বাণং প্রতিপদ্যতে॥
তত্র মধ্যে মহাবিম্বমহং বিন্দতি ইন্দ্রিয়ান্।
বীরাশ্চ স্বস্বভাবেষু শৃণ্বন্তু জ্ঞানসাগরান্॥
যোগিনীচক্রমধ্যাত্তু পৃচ্ছাম্যহং বারাহিকা।
ইন্দ্রজাল কিমাখ্যাতং ময়া তু কোঽত্র সংজ্ঞকঃ॥
দৃষ্টবাচ মহাচৈব সুখং ভুক্তং কিমেতৎ।
সমাধি নাম কিন্তত্র কৃতং তদ্ভবনেষ্বপি॥
সংসারং কিং সমুদ্ভূতম্ লয়ং যান্তি কমত্র তু।
নির্ব্বাণং নাম ভগবান্ সমুৎপদ্যতে কথং পুনঃ॥
বিম্বমাখ্যায়তে ব্রূহি তয়া বিন্দতি ইন্দ্রিয়ান্।
কথয়তু ময়ি স্বামিন্ মহাসুখেষু রূঢ়বান্॥
মহাবীরেশ্বরাহ।
শৃণ্বেকাগ্রমনা দেবি বারাহি দিব্যপদ্মিনী।
কথয়ামি সমাসেন লক্ষণং পূর্ব্বচর্য্যয়া॥
ইন্দ্রলোকাগ্রধর্ম্মাখ্যং জালং তন্মনক্রীড়ণং।
ময়াহঙ্কারমাত্রেণ যৎ পরঃ সময়োদ্ভবং॥
তস্মাদ্দৃষ্টং মহাজ্ঞানং মহোপায়সুখাবহং।
সম্ভুজ্যমিন্দ্রিয়ৈর্যেষু তেনাহং নামপূর্ব্বকং॥
তদা সমাধিমাত্রন্তু কথিতো মুনিপুঙ্গবৈঃ।
সমাধি গম্যতে জ্ঞানং বুদ্ধা তাং দিব্যমিন্দ্রিয়ম্॥
কৃতং ডাকবরৈর্ন্নৈকৈঃ সম্ভবো তেষু যোগতঃ।
নষ্টং সুখাসুখাদ্বৈত্যা পুনঃ সম্ভবমত্র চ॥
