বীরবাণী (১৯০৫)/শ্রীরামকৃষ্ণস্তোত্রাণি
শ্রীরামকৃষ্ণস্তোত্রাণি।
(১)
ওঁ-হ্রীং ঋতং ত্বমচলো গুণজিৎ গুণেড্যঃ।
ন-ক্তন্দিবং সকরুণং তব পাদপদ্মম্।
মো-হঙ্কষং বহুকৃতং লভসে যতোঽহং।
তস্মাত্ত্বমেব শরণং মম দীনবন্ধো! ১॥
ভ-ক্তিং ভগশ্চ ভজনং ভবভেদকারি।
গ-চ্ছন্ত্যলং সুবিপুলং গমনায় তত্ত্বং।
ব-ক্ত্রোদ্ধৃতোঽপি হৃদয়ে ন মে ভাতি কিঞ্চিৎ।
তস্মাত্ত্বমেব শরণং মম দীনবন্ধো! ২॥
তে-জন্তরন্তি ত্বরিতং ত্বয়ি তৃপ্ততৃষ্ণাঃ।
রা-গং কৃতে ঋতপথে ত্বয়ি রামকৃষ্ণে।
ম-র্ত্ত্যামৃতং তব পদং মরণোর্ম্মিনাশং।
তস্মাত্ত্বমেব শরণং মম দীনবন্ধো! ৩॥
কৃ-ত্যং করোতি কলুষং কুহকান্তকারি।
ষ্ণা-ন্তং শিবং সুবিমলং তব নাম নাথ।
য-স্মাদহং অশরণো জগদেকগম্য।
তস্মাত্ত্বমেব শরণং মম দীনবন্ধো। ৪॥
(২)
আচণ্ডালাপ্রতিহতরয়ঃ যস্য প্রেমপ্রবাহঃ
লোকাতীতোঽপ্যহহ ন জহৌ লোককল্যাণমার্গম্।
ত্রৈলোকেঽপ্যপ্রতিমমহিমা জানকীপ্রাণবন্ধঃ
ভক্ত্যা জ্ঞানং বৃতবরবপুঃ সীতয়া যো হি রামঃ॥
স্তব্ধীকৃত্বা প্রলয়কলিতম্বাহবোত্থং মহান্তম্
হিত্বা দূরং প্রকৃতিসহজামন্ধতামিস্রমিশ্রাম্।
গীতং শান্তং মধুরমপি যঃ সিংহনাদং জগর্জ
সোঽয়ং জাতঃ প্রথিতপুরুষঃ রামকৃষ্ণন্ত্বিদানীম্॥
(৩)
নরদেব দেব জয় জয় নরদেব
শক্তিসমুদ্রসমুদ্ভুতভঙ্গং
দর্শিতপ্রেমবিজৃম্ভিতরঙ্গং
সংশয়রক্ষোবিনাশমহাস্ত্রং
যামি গুরুং শরণং ভববৈদ্যং
নরদেব দেব জয় জয় নরদেব।
অদ্বয়ব্রহ্মসমাহিতচিত্তং
প্রোজ্জ্বলভক্তিপটাবৃতবৃত্তং
কর্ম্মকলেবরমদ্ভূতচেষ্টং
যামি গুরুং শরণং ভববৈদ্যং
নরদেব দেব জয় জয় নরদেব।