বীরবাণী (১৯০৫)/শিবস্তোত্রম্
শিবস্তোত্রম্।
ওঁ নমঃ শিবায়।
নিখিলভুবনজন্মস্থেমভঙ্গপ্ররোহাঃ
অকলিতমহিমানঃ কল্পিতা যত্র তস্মিন্।
সুবিমলগগনাভে ঈশসংস্থেঽপ্যনীশে
মম ভবতু ভবেঽস্মিন্ ভাসুরো ভাববন্ধঃ॥
নিহতনিখিলমোহেঽধীশতা যত্র রূঢ়া
প্রকটিতপরমপ্রেম্না মহাদেবসংজ্ঞঃ।
অশিথিলপরিরম্ভঃ প্রেমরূপস্য যস্য
হৃদি প্রণয়তি বিশ্বং ব্যাজমাত্রং বিভুত্বম্॥
বহুতি বিপুলবাতঃ পূর্ব্বসংস্কাররূপঃ
প্রমথতি বলবৃন্দং ঘূর্ণিতেবোর্ম্মিমালা।
প্রচলতি খলু যুগ্মং যুগ্মদস্মৎপ্রতীতম্
অতিবিকলিতরূপং নৌমি চিত্তং শিবস্থম্॥
জনকজনিতভাবো বৃত্তয়ঃ সংস্কৃতাশ্চ
অগণনবহুরূপো যত্র একো যথার্থঃ।
শমিতবিকৃতিবাতে যত্র নান্তর্বহিশ্চ
তমহহ হরমীড়ে চিত্তবৃত্তের্নিরোধম্॥
গলিততিমিরমালঃ শুভ্রতেজঃপ্রকাশঃ
ধবলকমলশোভঃ জ্ঞানপুঞ্জাট্টহাসঃ।
যমিজনহৃদিগম্যঃ নিষ্কলং ধ্যায়মানঃ
প্রণতমবতু মাং সঃ মানসো রাজহংসঃ॥
দুরিতদলনদক্ষং দক্ষজাদত্তদোষং
কলিতকলকলঙ্কং কম্রকহ্লারকান্তম্।
পরহিতকরণায় প্রাণবিচ্ছেদসূৎকং
নতনয়ননিযুক্তং নীলকণ্ঠং নমামঃ॥